लोकतंत्र मिरर
भारतीय संघाला १० वर्ष आयसीसी स्पर्धा जिंकता आलेली नाही. २०१३ मध्ये भारताने चॅम्पियन ट्रॉफी जिंकली होती, परंतु त्यानंतर त्यांना आयसीसी स्पर्धांच्या जेतेपदाने हुकलावणी दिली आहे. २०२१ व २०२३ मध्ये जागतिक कसोटी अजिंक्यपद स्पर्धेचे जेतेपद पटकावण्याची संधी होती, पण संघातील दिग्गज फेल ठरले. ऑस्ट्रेलियाकडून पराभव पत्करावा लागल्यानंतर आता भारतीय संघ आगामी वन डे वर्ल्ड कप व पुढच्या वर्षी होणाऱ्या ट्वेंटी-२० वर्ल्ड कप स्पर्धेच्या तयारीला लागला आहे.
भारतीय संघ आता १ महिना क्रिकेट खेळणार नाही. पुढील महिन्यात टीम इंडिया वेस्ट इंडिज दौऱ्यावर २ कसोटी, ३ वन डे आणि ५ ट्वेंटी-२० सामन्यांची मालिका खेळण्यासाठी जाणार आहे. BCCI ने कालच या मालिकेचे वेळापत्रक जाहीर केले. आता भारताच्या मर्यादित षटकांच्या संघातही फेरबदल होताना दिसणार आहेत. भारतात ऑक्टोबर-नोव्हेंबर महिन्यात होणाऱ्या वन डे वर्ल्ड कप स्पर्धेनंतर भारतीय संघ पूर्णपणे बदललेला दिसल्यास आश्चर्य वाटायला नको. बीसीसीआयने ट्वेंटी-२० संघाचे नेतृत्व हार्दिक पांड्याच्या खांद्यावर सोपवून त्या दिशेने वाटचाल केली आहे.
